阿仙奴季前弗到冇朋友，英超下周末開咧最後一場熱身賽，主場6:0大炒西維爾、捧走酋長盃。加比爾捷西斯㩒都㩒唔住，連中三元，成個熱身賽系列佢入足7球，睇數據，唔只極速融入咁簡單喎！
阿仙奴完成熱身賽，除咗閉門嗰場，其餘先後以5:3勝紐倫堡、2:0勝愛華頓、3:1勝奧蘭多城、4:0勝車路士，連埋今場大炒西維爾，5仗入20球失4球，狀態的確弗爆，相信唔會再好似上季出閘大脫腳，連輸3場喇呱？阿仙奴下周六凌晨3點，會喺開鑼獨腳戲打頭陣，作客水晶宮。
阿仙奴狀態明顯比西維爾優勝好多，加比爾捷西斯首次主場作賽勁搶韁，配合布卡約沙卡、加比爾馬天尼利、馬田奧迪加特，左中路都有靈活進攻，令西維爾防線疲於奔命。除耶穌仔入3球，布卡約沙卡亦梅開二度，尼基迪亞後備入場埋齋。
另邊廂曼聯亦喺奧脫福進行最後兩場熱身賽，周日對華歷簡奴外，前一日遇最強對手，結果以0:1不敵馬德里體育會。
兩隊近日都成為新聞焦點，因為C朗爭取離開曼聯，一度盛傳佢會轉投馬體會，引發馬體會球迷群情洶湧，憤怒抗議，話明C朗如果真係加盟，就會集體脱離會籍，呢單傳聞亦以馬體會會長表示，從來冇諗過要搵C朗作結。
除咗C朗未出得住同辛祖病咗，曼聯今仗繼續排強陣出擊，上半場依然全場逼搶，佔盡上風，可惜馬迪爾、拉舒福特都失機而回。
下半場中段，馬體會換入迪保羅、摩拉達、基沙文等人，加上曼聯體力下降，逼搶力度減弱，令形勢逆轉，而艾歷臣首度後備上陣，同般奴拍檔中場中，截擊力明顯減弱，令麥佳亞、連特路夫防守漏洞再次突現。祖奧菲歷斯86分鐘入波，正係藉曼聯中門大開，禁區邊較好炮台射死迪基亞。
