意大利盃四強上演意大利國家打吡，首回合先由祖雲達斯主場對國際米蘭。本來成場波都唔算激烈，嚴格計係悶戰一場。但國際米蘭前鋒盧卡古，就令球場氣氛突變，最終球證出示3面紅牌作結。
今場首個入球於83分鐘出現，主隊祖雲達斯右翼古亞達度接應傳送後推入禁區勁射破網成1比0。以為國際米蘭敗走都靈，但主隊守衛比爾馬於補時階段犯手球兼被判罰十二碼，國際米蘭由後備上場嘅盧卡古主射入網，雙方打和1比1。
而好戲就喺追和後正式上影，盧卡古之前已有黃牌在身，而射入十二碼後就向觀眾席擺出一手敬禮一手收聲動作去慶祝。唔單止祖雲達斯球迷不滿，就連球證亦以盧卡古作出挑釁行為再出示黃牌。盧卡古兩黃變一紅離場。
以為就咁收工咩，未咁快。雙方球員繼續爭拗，經球證調停後「循例」叫祖記中場開波再吹完場。當完場哨子聲一響，雙方球員就即刻互相指罵及推撞，其中古亞達度同漢丹洛域先是口角繼而動武，兩隊助教及球員就將當時人拉開，以免情況惡化落去。而球證亦都唔手軟，出示紅牌逐兩位離場。
賽後國際米蘭領隊施蒙尼恩沙基就話，盧卡古經常都以呢個動作慶祝入球，大家唔好過份解讀，其實無特別意思。另外亦會提出上訴，希望盧卡古及漢丹洛域可以打甩紅牌，等兩位可於4月26日次回合上陣。
