今周意甲焦點賽事之一，由祖雲達斯主場對羅馬。暫時由摩佬帶領嘅羅馬，於頭兩輪聯賽都贏晒，走勢好似比一勝一和嘅祖雲達斯好少少。但考慮到羅馬所贏嘅對手，只係克雷莫納以及沙蘭力坦拿，級數有別於今次對手祖雲達斯。摩佬究竟有乜妙計，作客去都都靈市都攞到分數呢？真係踢過至知。(周日00：30 Now 638 直播)
之前已提及到羅馬近兩場對手，乃克雷莫納以及沙蘭力坦拿。而更重要一點係羅馬呢兩場都贏得好辛苦，同樣以1比0僅勝。似乎前祖雲達斯前鋒戴巴拿加盟後，暫時睇唔出佢對攻力有好大幫助。今次倒戈相向，睇睇佢有無大突破。另一方面，近年冒起得好快嘅邊鋒辛尼奧路，因肩膀甩骹而要休息3個星期，對羅馬影響好大。呢個意大利國腳暑期已經被多支球隊包括熱刺睇中，猶幸摩連奴力留之下先至留效首都球隊。羅馬少咗個極具突破力嘅球員，競爭力點都打多少折扣。
祖雲達斯經過首輪大勝薩斯索羅3比0之後，上星期作客森多利亞令人有好大期望，點知「斑馬兵團」又故態復萌，於後場圍圈式傳送，完全缺乏創造力。賽後仲畀網友揶揄，以「八角形戰術」去取笑祖雲達斯。經過一星期冷嘲熱諷，相信祖雲達斯唔會再咁迂迴，會踢得更簡單直接，希望畀到對手更多壓力。
主隊新加盟前鋒米列克未必會打正選，拉賀域打單前鋒嘅可能性較高。首席門將施捷斯尼已康復，今場應該打正選。至於迪馬利亞就話一半一半，要肯定肌肉傷勢無問題先畀佢落場。
至於投注策略方面，揀個中位數2.5球「細」。始終呢類強鬥強賽事，雙方點都會踢得保守多少，大手交易唔易出現。
