祖雲達斯開季真係唔順，周日深夜主場對住弱旅沙蘭力坦拿，唔單止2:2打和，又再失分，完場前更同對手爆發大衝突，全場共出現4張紅牌，祖記教練阿里基都有份。
祖記近況低迷，今場繼續發夢，上半場竟然落後0:2。下半場絕地反撲，51分鐘，基爾臣比爾馬追成較接近紀錄。補時先係戲肉。93分鐘，祖記博到12碼，邦路斯主射先被救出，但佢反應快補中扳平。
更高潮喺95分鐘出現，米利克接應角球頂入，祖記連入3球反先，佢開心至極，衝向場邊除衫慶祝，畀球證趕出場。呢張紅牌出完，大鑊嘢先至出現，VAR研判後，認為米利克入波時，邦路斯處於越位位置並有影響比賽，改判入球無效。喺VAR研究期間，雙方職球員發生大衝突，祖記教練阿里基、古達度，沙蘭力坦拿嘅法斯奧都領紅牌。
呢個問題球，祖記真係幾冤枉，意大利《天空體育》賽後公開片斷，米利克頭槌入波時，客軍球員簡達華喺角球旗附近已經包晒越位；仲有埋數據顯示，簡達華距離底線2.9米，而米利克係3.24米，所以好大機會係VAR睇漏咗。邦路斯賽後表示：「我唔知球證同VAR有冇睇漏咗簡達華，就算睇漏，我當時亦冇任何動作影響比賽，冇理由判詐胡。」
上演唔到絕地反勝，無疑係幾慘情，但祖記季初表現的確麻麻，意甲2勝4和排第8位，完全唔符合季前期望；兩個新加盟中場主力，保羅普巴、迪馬利亞傷晒，無疑大失預算。歐聯分組賽首仗1:2負聖日耳門，周四凌晨主場對賓菲加，以球隊目前狀況，可唔可以全取3分，都真係幾大疑問。
