周一凌晨AC米蘭主場對羅馬，因為羅馬領隊摩連奴之前領紅牌停賽關係，聖西路球場就缺少咗話題人物。
至於AC米蘭整體陣容變化唔大，前鋒基奧特加上兩位側擊球員拉菲爾里奧以及沙利文卡斯。今場比賽AC米蘭可謂佔盡優勢，而且上半場踢咗半粒鐘就打開缺口。
30分鐘，AC米蘭當拿利開出角球，後衛卡魯魯飛身衝頂，皮球角度刁鑽收死羅馬門將柏捷斯奧。
羅馬失守後其實都有反撲，但幾位進攻球員包括戴巴拿、辛尼奧路等狀態都唔算太好，多次嘗試上腳製造攻勢都無功而還，上半場羅馬落後一球返入更衣室。
下半場局勢無太大變化，仍然由AC米蘭採取主導。縱然65分鐘羅馬換入一對中場，包括尼曼查馬迪以及後生仔泰洛域，唯谷極都谷唔起，最慘係去到77分鐘，AC米蘭由後備入替中場普碧加，接應拉菲爾里奧妙傳射成2比0。執住兩球在手，睇個勢AC米蘭贏波3分可謂相當穩陣。
不過足球比賽就係咁奇妙，AC米蘭球員心態稍稍放鬆，就埋下失分伏線。87分鐘，羅馬中堅伊賓尼斯迎頂角球追成1比2。
去到補時第3分鐘，羅馬右路開出罰球，尼曼查馬迪升高批頂被A米門將擋出不遠，前鋒阿巴咸門前執雞成2比2。羅馬由輸變和，全憑球員有打不死精神，鬥志可嘉值得鼓掌。
較早時間有森多利亞對拿玻里，所謂「帛金波」無出現到，拿玻里憑首席前鋒奧森漢以及艾瑪斯射入十二碼，作客以2比0勝出。奧森漢暫時以10個聯賽入球，繼續於神射手榜領先。
經過第17周賽事，基於爭標分子AC米蘭以及國際米蘭都和波收場，令到拿玻里以44分排榜首，以7分之大優勢領先祖雲達斯以及AC米蘭，後兩者同為37分。
下周聯賽拿玻里主場鬥祖雲達斯，若果拿玻里搞掂埋祖記，聯賽冠軍堅有望。自從馬納當拿協助拿玻里贏過2次意甲冠軍後，拿玻里都再無突破，就睇吓今季能否重溫美夢。
