意甲啱啱打咗一半，目前嘅冠軍超級大熱門，當然係拿玻里。隨住AC米蘭作客0:4大敗畀拉素，拿玻里榜首優勢領先至12分，相隔33年後，極有機會再度稱王。
拿玻里上次登頂意甲，係遙遠嘅1989-90球季，當時馬納當拿仍然在陣，以華麗攻擊型打法，衝擊當時以主守馳名嘅意甲。今季拿玻里又以攻制勝，19仗射入46球，同時只有14個失球，冠絕意甲，16勝2和1負50分，遙遙領先，唔單止成為半程冠軍，全季亦冇乜懸念，因為對手全部出晒事。
原本最接近係AC米蘭，但世界盃後全隊走樣，近5仗冇贏過，繼上周中意大利超級盃吞國際米蘭3蛋，周二凌晨返到意甲，繼續不設防，0:4慘負拉素，係該隊78年以來，首次連續兩仗淨負3球或以上。
A米都落後12分，其他國米、羅馬、拉素、阿特蘭大輸更遠，好難追到如日中天嘅拿玻里。原本祖雲達斯一度有8連勝走勢，以為仲有得玩，可惜世界盃後連續兩場失分，而且又因為做假賬罪名，除主席及尼維特等高層要總辭外，更被意大利足總扣15分，一口氣跌到落第10，如果季尾仲追到歐聯席位，已經係神跡。
天助拿玻里，但都有一個隱憂令佢哋失冠，就係同祖雲達斯相同嘅原因。有消息指意大利足總都有查拿玻里，特別係王牌中鋒域陀奧森漢，呢位尼日利亞國腳2020年以7500萬歐元由法國里爾來投，雖然睇番數據同表現，奧森漢係物有所值，但足總認為轉會費過高，仍視呢單交易為主要調查目標，一旦罪成，亦要面臨罰分。
