5年時間，由地盤工人變國家隊新星，聽落好似幾誇張，就快24歲嘅意大利新晉國腳、基亞連尼接班人加迪，確確實實做到了。
早喺7歲，加迪踢地區青年軍嘅時候已被球探發掘，被邀請去到拖連奴青年軍，可惜之後都係浮浮沉沉，未能獲提拔長約。
由於家境清貧，加迪17歲一畢業即投身社會，做過好多份工，包括喺地盤幫手執頭執尾，幫補家計。
不過環境極級惡劣都好，佢依然堅持足球夢。喺打工之餘，keep住踢業餘球會等機會，當時佢清晨就起身，開完工後，傍晚前趕返球會練波，一直去到3年前都仲係踢緊丁組聯賽。
加迪嘅表現喺業餘界大超班，好快又畀當時仲喺丙組嘅柏迪亞撬走，投身全職足球，去到上年再跳去意乙費辛隆尼，到今年冬窗，畀祖雲達斯以900萬歐元收購，再借番佢去費辛隆尼，下季歸隊，上位快過火箭。
加迪爺爺係拖連奴球迷，但當佢知道孫仔加盟愛隊死敵後，依然開心到老淚縱橫，攬住加迪爆喊：「我冇同佢講話會加盟祖雲達斯，我想畀個驚喜佢，但我返到屋企一打開門，佢已經開心到淚流滿面。」
上場對英格蘭，司職中堅嘅加迪獲得佢人生第一頂喼帽，而且攔截次數冠絕整隊國家隊，沉著冷靜，表現大獲好評。
「我之前都有預感會落場，開心到瞓唔著，又喺度諗，我通常面對嘅係意乙球員，但今次嘅對手係一大班英超、歐聯級球星，究竟得唔得㗎？好快我就諗通，唔好理對手係咩，保持我一貫喺低組別踢波嘅心態就ok了。」
意大利今晚會喺歐國聯作客德國，加迪極有機會獲得第二頂喼帽，繼續向基亞連尼接班人之路邁進。
