祖雲達斯、國際米蘭、AC米蘭、羅馬，4大意甲名牌，同日輸波極度罕見，呢個情況周日終於再出現，對上一次已經係67年前。
1955年2月，上述四大名牌，曾經同日倒灶，當季冠軍最後落喺費倫天拿手上。相隔67年再現同樣情況，係唔係預示佢哋4隊，今季做唔到真命天子？唔通真係拿玻里、阿特蘭大、甚至烏甸尼斯會爆大冷？
4大名牌中最大鑊嘅，當然係祖雲達斯，作客0:1負蒙沙，令升班馬得到意甲第一場勝仗。迪馬利亞開肘打人被逐，係輸波罪人之一，佢賽後亦為魯莽行為道歉。
祖記近5場比賽，成績僅為2和3負，無論意甲、歐聯都陷入崩潰局面。《都靈體育報》指球員對教練阿里基已失去信任，管理層有可能趁未來10多日係國際賽期，炒阿里基魷魚，任命新教練。
至於國際米蘭5分鐘已由尼高路巴列拿開紀錄，但之後連失3球，作客1:3負烏甸尼斯。
AC米蘭主場1:2負拿玻里，羅馬主場0:1負阿特蘭大。拿玻里、阿特蘭大目前經過7戰，依然不敗，17分並列榜首，烏甸尼斯16分排第3位。
羅馬輸波，但全場佔盡優勢，譚美阿巴謙多次錯失入球機會，摩連奴亦因為抗議球證冇判12碼，被球證逐出場。戴巴拿開波前熱身受傷，未能上陣。
