拿玻里今年有幾勁，相信球迷有目共睹。除咗前場有個奧斯文(奧森漢)之外，南韓後韓金玟哉亦都好受人重視。據聞幾間英超球隊包括熱刺都想收購佢，而拿玻里話5000萬歐元就有交易。
剛啱拿玻拿對萊切，金玟哉正選出場，協助球隊贏波再取3分。上半場18分鐘，就係金玟哉精準傳中，隊長迪羅倫素輕鬆頂成1比0。去到52分鐘，萊切禁區混戰中射成1比1。64分鐘萊切門將費干尼送禮，迎接隊友胸口回傳時甩手，目送皮球入網，拿玻里作客得以2比1勝出。
以依家球隊個勢咁好，金玟哉好有機會成為史上首位贏意甲冠軍嘅南韓球員，有個冠軍加入履歷表中，身價隨時會進一步提升。
現年26歲嘅金玟哉，身高1米90。足球生涯起步時效力南韓全北汽車，然後去中超踢北京國安。而令佢事業有大轉變係2021/22年球季加盟土超費倫巴治，僅一季就入選土超最佳陣容。今季就轉投意甲拿玻里，成為球隊爭標重要棋子之一。
有表現自然多人吼，傳得最勁就係熱刺。既有孫興敏在陣中，自然明白到南韓球員，可以為球隊帶來幾大效益。無論競爭力以及吸金力都係歐洲球隊所渴求。當然，金玟哉叫價唔低，未來日子有無可能同「孫仔」於熱刺拍住上，就要睇睇呢支倫敦球隊嘅誠意嘞。
