歐洲最弗爆球隊，依然係拿玻里！周三凌晨意甲快車，佢哋又喺主場以2:0挫安玻里，締造10連勝佳績。
目前歐洲5大聯賽，只有佢哋同巴黎聖日耳門，依然係聯賽不敗之師。經過14輪比賽，拿玻里12勝2和，較第2位AC米蘭多8分。打埋本周末賽事，意甲就會休戰，明年1月4日重開。
拿玻里恐怖之處，係攻力非常得人驚，14戰入34球，比第2入波多嘅AC米蘭多出7球。快速體力全攻型踢法時，防守亦有足夠水準，目前僅失10球，只高過祖雲達斯及拉素。
攻擊主力中，今仗有波蘭國腳施連斯基先任後備，「格魯吉亞美斯」基華拉斯基利亞養傷，但依家嘅拿玻里真係大把炮台。
尼日利亞中鋒域陀奧森漢雖然冇波入，但憑個人能力搏得12碼，夏榮羅辛奴主射先開紀錄。呢位墨西哥鋒將突破力強、傳送準繩，今仗極度活躍，88分鐘過完人再畀靚傳，由後備登場嘅施連斯基射成2:0，達成10連勝。
拿玻里於歐聯亦交出水準，前5輪分組賽全勝，更大炒利物浦、阿積士，最後一輪於極大機會首名出線情況下，先至作客負利物浦，拿玻里晉級後，16強嘅對手係德甲法蘭克福。
2023年，會唔會係拿玻里繼馬納當拿王朝後，另一稱霸時代之開端？拿玻里上次封王意甲，係1989/90球季。
至於上季冠軍AC米蘭，今輪又失分，作客悶和倒數第3嘅克雷莫納。奧歷治少有機會做正選，可惜有單刀失機及食詐胡；拉菲爾利亞奧後備登場，亦欠埋門機會。
呢個時候，當然最掛住銀河唯一，可惜基奧特上仗臨完場為球隊奠定勝局，開心得滯除衫慶祝，領第2張黃牌被逐。冇咗佢，AC米蘭少咗一張扭轉困局嘅王牌，只能失分畀弱隊，進一步落後拿玻里。
