入波型門將，坦哈格啱唔啱胃口？基奧特喺尋晚意甲作客熱拿亞，再一次成為AC米蘭嘅贏波功臣，不過佢今次唔係入波，而係救波！
意甲班霸AC米蘭，今季表現出色，尋晚作客熱拿亞，亦戰至87分鐘由美國隊長基斯甸普列錫喺禁區內一控、一抽先開紀錄，以為3分在望，點知完場前高潮迭起！
補時階段，A米嘅法國門將邁治蘭出迎，喺禁區外用膝頭撞跌對手，VAR檢視後判定紅牌，由於A米已經用晒換人名額，基奧特臨時拉伕，着住邁治蘭件波衫客串守龍。
熱拿亞踢多一人當然瘋狂進攻，佢哋個門將祖斯馬天尼斯幫手助攻，可惜因為犯規同樣被逐。踢到最後階段，熱拿亞鋒將佐治普斯卡斯半單刀，基奧特反應勁快，除咗準時出迎拍走個波，再喺熱拿亞球員趕到執雞前，回身將個波擒實。
經歷咁精彩嘅撲救之後，一眾隊友唔係拍基奧特膊頭，就係走去攬實基奧特慶祝，呢位法國前鋒亦振臂高呼，相當激動。賽後AC米蘭藉國米同晚和波失分，得以升上意甲榜首。
基奧特賽後話：「老實講，我真係唔識門將應該有嘅動作，當時我只係憑感覺去判斷，我覺得出迎係好過就咁企喺龍門口……我會裱起呢件邁治蘭嘅波衫作為留念！」
賽後全球網民同時抽水，激讚基奧特勁過奧拿拿，銀河唯一先係曼聯應該要買嘅用波型門將：「佢做曼聯正選門將啦不如」、「如果係奧拿拿一定唔會出迎、望住熱拿亞射入」、「佢足球生涯多嘅不失球紀錄肯定多過奧拿拿」、「作為臨時門將，佢嘅撲救比某常規門將更好。」
