【意甲】領隊皮奧利全心準備歐聯,今周10人次選應付意甲,博洛尼亞有嘢爭鬥志好

AC米蘭下周將會於歐聯8強次回合,再鬥同屬意甲嘅拿玻里。據當地《天空體育》所講,為令主力球員有足夠時間休息,AC米蘭領隊皮奧利決定今晚將作出大輪換。

本周作客博洛尼亞,AC米蘭除咗門將邁治蘭之外,將會派出10個後備球員。咁做法當然要冒聯賽失分危險,但正所謂針無兩頭利,現階段AC米蘭一定放歐聯為首位。

對於排第8位嘅博洛尼亞嚟講,球隊其實都有目標。若然佢哋上到第6位的話,就會攞到來季歐協聯參賽資格。雖然話係第3級別歐洲賽,但對於規模唔大嘅博洛尼亞嚟講,已經相當之鼓舞,亦對球隊財政有一定幫助。

其實博洛尼亞近況唔錯,近2場先後以3球及2球淨勝烏甸尼斯及阿特蘭大。今場面對AC米蘭副選隊兼有主場之利,有一定贏波機會。