A米又有父子兵！與最著名嘅忠臣馬甸尼家族唔同，今次呢對父子，並非一個教練、一個球員咁傳承，而係有機會同時落場做隊友！講緊嘅，係戰神伊巴謙莫域。
已屆41歲嘅瑞典巨星伊巴謙莫域，自去年5月開始就一直缺陣，養傷接近8個月後，近期全面復操，上個禮拜AC米蘭對拖連奴一戰，更獲召入大軍名單，披甲只係時間問題。
到周中歐聯16強首回合擊敗熱刺後，《米蘭體育報》指A米教練皮奧利，安排冇上陣同後備嘅球員，同U18踢熱身賽，伊巴謙莫域亦有上陣，不過佢今次唔係代表一隊，而係同囝囝合作，為A米U18披甲。
伊巴囝囝叫Maximilian，今年16歲，兩父子合組鋒線，老竇正箭頭，囝囝踢翼鋒。場面咁珍貴，伊巴謙莫域亦有喺twitter分享呢個重要時刻，個po除咗有片，亦有簡單留言「DNA」。
從部分訓練短片見到，伊巴有控波，亦有窩利，至於囝囝嘅盤球技術亦唔曳。除咗Maximilian，伊巴15歲嘅細囝Vincent，同樣效力A米青年軍。唔知幾時會見到呢三父子，齊齊喺一隊上陣呢？
史上第一對有數據統計、喺同一場賽事披甲嘅父子兵，係前車路士名將古莊臣同佢老竇阿諾古莊臣。1996年冰島友賽愛沙尼亞，當年34歲嘅阿諾古莊臣，喺比賽中被17歲嘅古莊臣入替。至於巴西一代名將李華度就最經典，佢唔單止試過同囝囝同場作賽，更加喺同一場比賽中入波。
