拿玻里手執半隻盃耳！周六凌晨意甲賽事，一哥拿玻里作客以2比0輕取薩斯索羅，目前踢多一場、領先次席國米18分，封王意甲、一搔33年之癢預計只係時間問題。
呢場波除咗令拿玻里放甩18分，尼日利亞前鋒奧森漢，更成為拿玻里史上首位連續7場意甲入波嘅球員，而主帥史巴列堤教波生涯第1000場比賽，亦有個超美滿嘅成績。
薩斯索羅今季雖然跌晒Watt，但近期全面回勇，近4戰2勝2和狂搶8分，暫時逃離降班區，包括早前以5:2炒AC米蘭，可惜今場完全頂唔住客軍拿玻里，開波僅12分鐘，拿玻里翼鋒基華拉斯基利亞由中圈開始突破，一路殺入禁區邊起腳，轟入世界波。
之後奧森漢窄角度勁射得手，鎖定2:0勝局。呢球波，亦令奧森漢超越球王馬納當拿，成為拿玻里史上首位連續7場意甲入波嘅球員，而佢自己亦已斬獲18球，繼續領先射手榜。
同時，今場係主帥史巴列堤執教生涯第1000場意甲，喺呢個里程碑再配合贏波，相當美滿。
拿玻里踢完呢場後，就要馬不停蹄為下周二深夜嘅歐聯16強作準備，佢哋首回合會先作客法蘭克福。
