意大利那不勒斯係三反之地，黑手黨橫行、垃圾如山無人清理。但每年世界各地都有過百萬人到當地朝聖。其中一個元素，就係此地其實係薄餅發源地，唔少吃貨都到當地一嘗正宗味道。
另一個吸引位就係球隊拿玻里，無論老中青球迷，都希望感受一下已離世嘅阿根廷球王馬納當拿、當年於那不勒斯如何施行神跡，為拿玻里撰寫光輝一頁。
1905年，英國水手威兼普夫斯同事赫達拜仁，創立那不勒斯足球及木球會。去到1926正式改名為拿玻里。正如打育成遊戲一樣，起初拿玻里又無資源兼level低，根本無能力同財雄勢大嘅北部球隊抗衡。二戰之後同埋六十年代初，更曾跌落意乙。經過漫長低潮期後，拿玻里終於得到上天眷顧：馬納當拿由西甲巴塞隆拿轉投拿玻里。
神人降臨，拿玻里就好似開外掛一樣。馬納當拿效力球隊7年期間，贏得2次意甲冠軍、1次意大利盃冠軍、1次意大利超級盃冠軍同埋歐洲足協盃。不過好景不常，自馬納當拿離開拿玻里後，球隊成績一落千丈，加上受嚴重財政問題影響，2004年拿玻里宣布破產兼跌落意丙。不過另一位救世主出現再次打救球隊，所講就係現任主席，電影大亨迪羅倫迪斯。
迪羅倫迪斯於2004年收購拿玻里，2006年正式成為球隊主席。佢唔單止為球隊處理近7000萬歐元債務，期間更不斷引入球員，令拿玻里實力提升，07/08球季回到意甲作賽。迪羅倫斯斯當時曾經講過，要令球隊再贏聯賽冠軍，要令那不勒斯球迷再次感到喜悅。
迪羅倫迪斯果然講得出做得到，咁多年來為球隊注入資金，亦引進唔少好球員及好領隊，較為人所熟悉嘅，包括前鋒希古恩以及卡雲尼。領隊方面，賓尼迪斯以及安察洛堤都曾經執教過拿玻里。經過長時間打造，拿玻里成為現已成為一支具爭標能力嘅球隊。無論歐洲賽以及本土賽都有好演出，證明迪羅倫迪斯一路以來嘅付出無白費。
拿玻里攞過2次意甲冠軍，包括86/87及89/90年球季。去到2023年，拿玻里極有可能迎來史上第3次聯賽冠軍。據報當地球迷已準備上街慶祝，要將冠軍獻畀馬納當拿，希望「馬神」可繼續保祐拿玻里，未來日子勢要打破意大利地區差異，成為最具標誌性及話題性嘅球隊。
拿玻里冷知識：
- 球隊綽號為I Partenopei。古希臘人於那不勒斯建立城市Partenopei，球隊就用返呢個名紀念歷史。
- 拿玻里主場本來叫聖保羅球場，為紀念馬納當拿，所以2020年改名為馬納當拿球場，另外其10號球衣亦永遠退役。
- 代表拿玻里上陣次數最多係斯洛伐克球員咸錫，於2007至19年間，合計520場。
- 代表拿玻里入球最多係比利時球員馬頓斯，於2013至2022年間，合計射入148球。
- 現時拿玻里球衣供應商係意大利時裝名牌Emporio Armani。
- 拿玻里為那不勒斯唯一主要球隊，所以唔似得羅馬、米蘭、都靈等地有同區球隊打吡對決。
