以射罰球馳名嘅前南斯拉夫國腳米赫洛域，上周不幸辭世，周一於羅馬舉殯，包括文仙尼、史坦高域及林巴度等球員時代的隊友，均有份出席及扶靈。
米赫洛域（Sinisa Mihajlovic）葬禮，於羅馬天使與殉教者聖母大殿舉行，不少意大利球壇人士都有出席，悼念呢位90年代名揚天下、以出擊聞名嘅後衞。
文仙尼、史坦高域及林巴度3位名宿，分別喺森多利亞及拉素，同米赫洛域做過隊友，共同為意甲近代最輝煌時期奉獻精彩時刻。三人於喪禮最後部份，負責為老戰友抬起棺木出教堂。
意大利國家隊主帥文仙尼與米赫洛域關係親密，兩人除咗喺森多利亞、拉素都做過隊友，後來前者執教國際米蘭期間，亦邀請米赫洛域擔任助教。文仙尼向傳媒高度讚揚呢位昔日戰友，指佢即使患病，仍然好似獅子一樣，戰鬥到最後一刻。
另外，出席儀式仲有作為後輩嘅前塞爾維亞國腳高拉洛夫、羅馬王子托迪、迪羅斯、巴里斯、迪里維奧及費奧利等名將。而拉素主席洛迪圖、羅馬市長加堤葉里及意大利體育部長阿波迪亦有到現場致敬。
米赫洛域球員時代有罰球專家稱號，效力拉素時，曾試過在倒戈前東家森多利亞比賽中，靠罰球連中三元；退役後執起教鞭，曾帶領過卡坦尼亞、費倫天拿、森多利亞、AC米蘭及博洛尼亞等球會。
