法國星級中場普巴，上星期歐霸盃4強對西維爾時表現唔錯，見佢狀態回升，返到聯賽對克雷莫納，領隊阿里基就首次畀普巴打正選，點知又出事！
踢到22分鐘，保羅普巴就坐喺場上，向場邊示意受傷，經醫療人員簡單治理後，普巴未能夠繼續比賽，24分鐘就由米列克入替。
普巴對上1次正選已經係2022年4月18日，當時對手係利物浦。咁辛苦捱過養傷期，兼且終於有得打正選，依家又再傷過，相當慘情。
據報，好彩普巴唔係觸傷舊患，只係大腿肌肉拉傷，情況唔算嚴重。不過今季只剩番3輪聯賽嘅情況下，普巴應該趕唔切康復上陣。同樣，歐霸盃次回合亦都唔使預佢嘞！
至於祖雲達斯與克雷莫納，上半場未有任何突破，入球要去到55分鐘先出現。基艾沙左路傳中，法佐尼禁區頂撞射成1比0。79分鐘，比馬透過角球攻勢轉化成入球，斑馬兵團以2比0擊敗對手。
