即將去土耳其踢歐聯決賽嘅國際米蘭，於主場與阿特蘭大合演入球騷，結果國際米蘭憑兩大前鋒盧卡古以及拿達路馬天尼斯各取1粒，最終以3比2擊敗阿特蘭大。
而費倫天拿以及羅馬都有份出爭歐賽，雙方就喺意甲撞正，兩隊都派大量副選，結果費倫天拿就以2比1反勝對手。羅馬領隊摩連奴輸波嬲豬，再次缺席賽後記者會。
國際米蘭為保住前4位置，今場強陣出擊。面對踢法大開大合嘅阿特蘭大，啱晒國米胃口。開波後僅39秒，國際米蘭就已經搵到入波機會，前鋒拿達路馬天尼斯中圈直傳，盧卡古突破對手防線單刀直入，最後扭過門將史博迪路輕鬆射成1比0。
閃電都冇咁快，3分鐘，國米左翼迪馬高窄位抽射，阿特蘭大門將史博迪路擋出不遠，中場巴利拉窩勁射成2比0。
阿特蘭大短時間連番失守，激發起球員小宇宙。36分鐘柏沙歷於門前混戰中追成1比2，雙方亦以呢個比數完半場返更衣室。
下半場雙方繼續鬥攻，質素較高嘅國米於77分鐘再有入球。盧卡古於中場附近妙傳畀波索域，後者殺入禁區後唔貪功，橫傳畀拿達路馬天尼斯射成3比1。補時1分鐘，阿特蘭大蒙尼爾主射罰球，皮球省中人牆彈出，蒙尼爾即衝前怒射成2比3。
於不足一星期內，國際米蘭先贏意大利盃，再於今場肯定聯賽前4位置，領隊施蒙尼恩沙基話絕唔容易。
對於盧卡古狀態回勇，施蒙尼恩沙基話去到歐聯決賽，會考慮派佢打正選。但現階段仍要考慮各球員回復情況，定必會以最佳陣容與曼城一拼高低咁話。
