摩連奴終於奪得心頭好！羅馬喺新季意甲出師不利，兩戰只得1和1負，不過羅馬球迷仍然對新季充滿期待，因為前意甲MVP盧卡古，即將正式成為「雌狼」一份子！
羅馬上季爭前4功虧一簣，原因就係去到季尾因陣容單薄，傷兵過多而崩盤，新季摩佬仍然以爭前4為目標，極具級數嘅艾奧亞、連拿度辛捷斯相繼來投，更令球迷無限憧憬。
可惜事與願違，羅馬喺開咧後首兩仗對手只係沙蘭力坦拿同維羅納，但卻只得一和一負。譚美阿巴咸要到出年3月先復出，正中鋒只得比洛堤一人，喺盧卡古拒投沙特聯賽後，摩佬就一直吼住機會出手斟介。
眼見轉會窗即將關閉，目前被下放到車路士U21跟操嘅渣古，亦開始心急，摩連奴睇準機會，直接同車路士傾借用，再打畀最終羅馬成功以500萬鎊租借費，再加750萬歐元年薪，氹掂盧卡古減薪來投。
750萬歐元人工對羅馬嚟講，絕對係天價，但對一直想要超強力中鋒嘅摩佬嚟講，能夠以呢個價錢簽到一線球星，總算係夢想成真。摩佬可以用盧卡古作為支點制定戰術，配合戴巴拿一剛一柔，令攻力大幅提升。
之前摩佬受訪嗰陣都講過，佢同盧卡古喺車路士年代嘅不和，早就已經係過去式，二人喺曼聯時期二度合作，亦有晒默契，如今三度攜手，當然唔會出現任何矛盾。
