羅馬自從由美國財團執掌之後，無論成績以及商業市場都變得正面。近年佢哋就大打東瀛牌，希望開拓吓亞洲市場，藉此提高球隊收益。
最近羅馬公布，與日本車廠豐田達成贊助協議，羅馬男子隊以及女子隊嘅操練服裝，將會印上Toyota個大名。另外羅馬大軍出行時，都會乘坐豐田及凌志系列車款。查實豐田都幾鍾意贊助大球隊，以前就曾經贊助過費倫天拿。
既然打開咗日本呢條水喉，羅馬梗係食住個勢要加大力度做宣傳。據講世盃舉行期間，羅馬將會飛去日本踢表演賽。一來keep住班球員狀態，二來尋找新商機。有啲資歷嘅球迷，都應該記得前日本國腳中田英壽曾經效力過羅馬，自此之後日本球迷都對羅馬有一定認識，至今亦累積到唔少球迷。羅馬都好識撈，開埋個日文twitter同當地球迷保持接觸。
唔講你唔知呀，羅馬女子隊上個月仲簽咗日本女足國家隊南萌華，23歲嘅華女出身於埼玉縣，以前踢浦和紅鑽，司職後衛。南萌華能力方面就真係唔清楚，但對於羅馬打東瀛市場點都有幫助。
