意甲首輪賽事，羅馬作客憑中場基斯坦迪喺33分鐘入波，以1比0小勝沙蘭歷坦拿。而幾位新加盟嘅羅馬球員，比如戴巴拿、尼曼查馬迪以及雲拿當都有亮相，其中戴巴拿正選出場踢夠89分鐘先被換出。呢位阿根廷前鋒都幾勤力，上半場仲有腳單刀趟射幾乎搞掂，可惜畀條門柱頂住。
今場羅馬領隊摩連奴都幾有心部署，上半場就搶攻，下半場就勒住踢，積極性遠不及頭45分鐘。比賽去到70及79更換入新兵尼曼查馬迪以及雲拿當，務求控球在腳穩定局勢。摩佬賽後就話，如果班波贏到3比0或者4比0梗係好，但唔係場場波都要狂搶狂攻，有時都要睇局勢發展去處理。
另外，羅馬有意趁轉會窗關閉之前，再添置1至2名球員。其中拖連奴前鋒比洛迪係其中之一。28歲嘅比洛迪因唔肯同拖連奴續約，依家成為自由身球員。據悉之前比洛迪已經拒絕咗狼隊以及加拉塔沙雷邀請，似乎等緊羅馬畀份靚合約佢。
