數字呢回事，藴含無窮奧秘，「666」、「777」（講緊jackpot，唔係核突嘢），以廣東話計嘅仲有好多，例如8字尾係意頭嘢，9字尾代表一啲hihi等等。喺足球世界，波衫冧把亦極具象徵意義，代表某啲球員，擁有特殊、甚至歷史地位。
10號仔，傳統上最好波嘅代表，但喺曼聯，地位最高係7仔，由丹尼士羅開始，一直到笠臣、簡東拿、碧咸、C朗。
近日，祖雲達斯波衫冧把大執位，引起好多議論。傳統上，祖記都係10號皇牌，由柏天尼、巴治奧到迪比亞路，全部經典過經典。
斑馬10號，上一手係戴巴拿，雖然阿根廷靚仔幾有觀眾緣，但經典程度就相差好遠，畢竟時代唔同，好難復刻。依家戴巴拿離隊，邊個會做新10號仔？保羅普巴呀！
呢位法國中場已官宣重返祖雲達斯，早幾日出席加盟儀式，受到球迷熱烈歡迎，有人遞件曼聯波衫畀佢簽名，仲好有型咁拒簽添！
雖然普巴今次回歸，獲大批球迷接機，猶如國王出巡，不過唔少祖記球迷認為，佢未必夠格著呢件10號波衫，畢竟佢近幾季喺曼聯勁多是非，轉髮型次數多過出場次數，又被爆係曼聯更衣室「毒瘤」，怕佢整衰呢個號碼，有啲直情話「RIP del piero’s number.」
至於一啲較好心嘅祖記粉絲，就希望普巴明白祖記10號嘅意義，希望佢負起10號應有嘅責任。
其他主力會孭乜老冧？受重傷長抖嘅費達歷高基艾沙，新季猛虎出柙，會著曾經屬於C朗嘅7號。上季中加盟、傳統型中鋒杜辛華荷域，將會讓出7號，著番中鋒應著嘅9號，代替已離隊嘅艾華路莫拉達。
除普巴外，另一新加盟球員迪馬利亞係著22號，「天使」一向作風低調，默默耕耘作最大貢獻，著乜冧把波衫有乜所謂？
