AC米蘭以及國際米蘭呢對歐聯4強對手，星期日凌晨於聯賽分途出擊。較早舉行嘅史柏斯亞主場對AC米蘭，以為A米可以喺歐聯4強次回合之前，贏返場波激勵吓士氣，點知又輸多場0比2。
今場史柏斯亞都幾積極，事關係護級球隊，可以話係拼死一戰。相反A米唔知係咪有歐聯包袱，感覺上有少少就住踢。
比賽去到第75分鐘出現首個入球，主隊史柏斯亞開出角球，A米波路托尼解圍唔湯唔水，被雲斯尼斯基門前補中成1比0。去到85分鐘，史柏斯亞嘅艾斯普薛圖罰球搞掂，結果淨勝2粒。
至於國際米蘭對薩斯索羅，比賽就激烈好多。上半場41分鐘，國米前鋒盧卡古背向對方守衛，再於禁區頂轉射抽射成1比0。
55分鐘，國米後衛比拿路華傳中，點知薩斯索羅雷恩多腳「擺烏龍」，國米領先到2比0。58分鐘，國米前鋒拿達路馬天尼斯右邊禁區邊施射，省中客隊魯安查斯蘇迪後改變方向而入，國米就咁領先到3比0。
以為場波就咁玩完，但薩斯索羅並無放棄，力求奇跡出現。63分鐘，佢哋先由馬菲奧斯漢歷基於小禁區施頭錘頂成1比3。77分鐘，客隊大衛法迪斯接應左路傳中，輕鬆頂成2比3。好彩，國米盧卡古今場大勇，於89分鐘個人殺入禁區再起食糊左腳射成4比2完場。
國米贏波後，與踢少場嘅祖雲達斯同得66分並列第2及第3。拉素較早前就同萊切打和2比2，暫時以65分守住第4。至於輸波嘅AC米蘭就排第5，與拉素差4分。
睇返A米最後3場聯賽，順序係主場對森多利亞、作客對祖雲達斯以及主場對維羅納。除咗祖雲達斯，其餘2支對手實力都唔強；至於拉素餘下賽程分別係作客烏甸尼斯、主場對克雷莫納及作客安玻里，A米形勢上的確有啲不利。
