羅馬周日晚主場1比0擊敗祖雲達斯，取得重要3分，增加爭入前4本錢。今仗亦係摩連奴首次喺意甲再遇對頭人，結果佢贏咗保羅普巴。
上仗對榜尾克雷莫納，羅馬爆大冷輸波，摩連奴因同第4球證衝突被逐，但畀佢打甩，可以繼續督師。面對強敵，摩佬排陣有新意，用荷蘭中場韋拿杜姆打前鋒，配合戴巴拿。
新進攻組合效果唔顯著，基本上畀祖記㩒住砌，但門楣門柱，3次救咗羅馬，仲憑中堅基安盧卡文仙尼，53分鐘射入世界波全取3分，積分榜壓過AC米蘭，進佔第4位。
今仗雙方都有曼聯舊將，羅馬除咗摩連奴，仲有基斯史摩寧、尼曼查馬迪；祖雲達斯有迪馬利亞，保羅普巴亦喺77分鐘後備上陣。
摩佬當年含恨離開曼聯，主因係同球員關係鬧僵，保羅普巴係反摩派頭目，得到領導層支持，摩佬被迫走後，普巴更被影到跳舞慶祝。即使摩佬去到熱刺，呢位法國中場接受訪問時，仍然出力批評前領隊，相當記仇。
講麻煩，兩個半斤八両，曼聯知瀨嘢，今季冇挽留普巴續約，畀佢轉會祖雲達斯。由於受傷關係，今仗首次意甲再遇摩連奴。
賽後摩佬冇講普巴，佢主要話：「今場贏得好辛苦，唔係戰術上取勝，最重要球員鬥志同態度，並無其他因素。」鬥志同態度，點解聽落都好似唔止淨係同普巴講咁嘅？
