上周意甲森多利亞以0比2輸畀烏尼斯之後，正式確定提早4輪聯賽降班。睇返歷史，森多利亞於1999年、2011年及2023年降班，即每逢12年就告別甲組，唔知同玄學有無關係？
講到森多利亞，名氣當然唔夠三強祖雲達斯、國際米蘭及AC米蘭。但對於好多香港球迷嚟講，森多利亞係有一定份量。
森多利亞於80年代中至90年代初最威水，90/91年球季贏意甲冠軍，另外85至94年間6度闖入意大利盃決賽，曾4次捧盃。歐戰方面，89年於歐洲盃賽冠軍盃攞亞軍，翌年就成功補中。91/92球季踢歐聯殺到入決賽，可惜只得亞軍，加時以0比1不敵巴塞隆拿。
相信好多球迷都記得，森多利亞於94年去到香港大球場，與本地球隊東方踢表演賽。當年隨隊來港有法國柏列、「大力水手」林巴度、維祖活等等。雖然仲有好多球星無嚟，但香港球迷都已經好開心。而當年執教森多利亞係邊個？相信無乜人記得，佢就係艾歷臣，即係執教拉素、曼城、英格蘭國家隊嗰位。最終森多利亞大勝東方4比1，港督肥彭頒獎，當時成班球迷衝晒落球場，氣氛超正。
95年森多利亞重臨香江獻技，對手就係星島。當日落起大雨，加上大球場草面情況極差，被笑稱為「薯仔田」。呢場森多利亞就贏6比3，巨星古列治、現任意大利領隊文仙尼、一代門神辛格都有嚟香港，論星味其實比94年更濃。
以往森多利亞確實有唔少球星效力過，之前提及過有古列治、文仙尼、辛格、林巴度等等，仲有柏魯加、維埃里、華朗、奧迪加、米赫洛堤、施多夫、卡林保，「飛機仔」蒙迪拿，至於近代就有卡斯辛奴。
另外，森多利亞當銳年代都係由石油公司老闆支持。1973至2000年就由石油大亨文杜雲尼父子(Pontoil)揸旗。去到2002至2014年，森多利亞主席就係來自石油公司ERG嘅加朗尼父子。其實現世代亦一樣，使得起錢嘅球隊，班主好多時係都搞石油生意嘅中東財團。
