31歲、傷患纏身、被球會放棄、無人有興趣接收，曾經嘅天之驕子艾朗藍斯，新季仲可以去邊？
威爾斯王牌艾朗藍斯，曾經係阿仙奴球迷寵兒，佢08年由卡迪夫城加盟，攀上事業高峰，19歲已經被雲格認為係「識得進攻嘅堅尼」，前途無量，可惜2010年2月，發生咗著名嘅「梳爾哥斯事件」，艾朗藍斯脛骨同腓骨骨折，復出無期，但喺6月，阿仙奴照樣開出一紙長約畀藍斯以示支持，夠晒情義。
終於喺同年11月尾，艾朗藍斯正式復出，但狀態已大不如前，之後分別外借到森林及卡城，但當大家以為藍斯就此玩完，呢位威爾斯王子就嚟個大翻身，重返阿仙奴後越踢越好，平均表現同實力，甚至更勝重傷前。
雖然藍斯曾有「入波就會令名人死亡」嘅傳說而獲封死神，但係人都知個傳說只係附會，反而越多人談論，令藍斯人氣更爆，2013年更試過連續4個月當選球隊MVP，之後成為阿仙奴兩奪足總盃功臣，2019年以自由身加盟祖雲達斯，周薪更加去到40萬鎊，成為史上最高人工嘅英國球員。
之後嘅故事大家都知喇，傷患頻仍、喺祖記失寵，上季外借去格拉斯哥流浪更孭晒鑊，喺歐霸決賽射失12碼，格流亦無意留用，而祖記為咗慳人工，亦打算畀340萬鎊當賠償金，提早同藍斯解約。
世界盃喺年底就會開鑼，藍斯作為威爾斯王牌，需要盡快搵一間可以畀佢長期做正選嘅球會，去Keep住狀態。據指暫時未有大球會對佢特別有興趣，《Mirror Football》分析指，5隊波有機會成為藍斯嘅下一家，分別係藍斯出道嘅卡城、曾經短暫效力嘅森林、朗尼嘅華盛頓聯隊、急需中場嘅愛華頓，與及雲尼斯達萊掌舵嘅PSV。
