摩連奴最近玩紋身，右臂紋上歐聯、歐霸、歐協聯三大獎盃，顯示自己獨一無二嘅功勛。魔力難擋，摩連奴兩句說話，説服戴巴拿加盟羅馬，意甲新球季，將向米蘭雙雄、祖雲達斯發出強力挑戰。
戴巴拿離開祖雲達斯，新季會踢邊隊，係暑假轉會市場焦點之一。依家終於落實加盟羅馬，呢位阿根廷射手會坐羅馬老闆私人飛機前赴葡萄牙，會合正喺當地集訓嘅羅馬新隊友。
羅馬新季只踢歐霸，據知新合約年薪亦只係450萬歐元，遠低於祖記時期嘅收入。點解仍然決定揀羅馬？摩連奴當然係最重要因素。
據多間意大利媒體包括《RomePress》指，傾約過程中，摩連奴兩次直接打電話畀戴巴拿，以佢已經成魔嘅氹人能力，進行游説，佢使出兩大絕招，第一係承諾：「羅馬會以你為核心！」呢句嘢即時打中戴巴拿心坎，因為無論喺祖記抑或阿根廷國家隊，佢經常都只做陪襯角色，對已經好耐冇享受核心待遇嘅戴巴拿，比錢更加重要。
第二招仲堅，佢向戴巴拿講：「我會幫你攞金球奬！」聽落吹過籠，但出自摩連奴把口，絕對係另一番境界！點解有人可以做教主，咁多信徒膜拜，口才梗係超重要啦！
雖然戴巴拿入摩教，但都有經理人睇住，唔會完全傻晒，點都有條款保護，新合約中，有一個相當低嘅解約金條款，只係約2000萬歐元，令戴巴拿未來可以低價離開羅馬，若然發展唔理想的話，佢好容易就可以轉會。
戴巴拿已被視為羅馬球會史上，其中一個最重要嘅引援行動，佢同譚美阿巴謙組成鋒線，的確令人期待。無論嚟緊成績好壞，羅馬今次都係大贏家，除咗戴巴拿肯減人工，仲解決埋自托迪退休後，冇招牌球星問題。呢位靚仔喺IG有4500萬followers，當中大量女球迷，嚟緊好易搵到更多贊助商，加埋教主摩連奴，無論吸金同吸like，都會走喺第一線。
