摩佬魅力，成為羅馬復興嘅關鍵！上季羅馬捧走歐協聯，贏得球會近60年來首個歐洲賽冠軍，球迷開心度爆燈，首階段主場套票嘅銷量，係近18年來最高，摩佬亦食住個勢，力斟兩大巨星級舊部，邊兩個？咪就係巴利同C朗囉！
摩佬每一次受質疑，都總會用成績說話，摑批評者一巴，之前被插淨係識泊大巴，執教熱刺時就入足100球，雖然最終都係被炒，但去到羅馬，話咁快又捧歐協聯，加上曼聯經歷劫難後，先發現最好嘅原來早已出現，摩佬功力同魅力，唔到你唔服。
老實講，羅馬早已失去豪門筆直及光環，每年都有球星被撬走，令唔少球迷心噏，不過經過上季摩佬效應，新季主場套票，首階段已賣出33,500張，係2004年後，銷量最高嘅一次。
摩佬當然冇放慢腳步，尤其陣中球星繼續被撬，米希達利恩已投國米，核心辛尼奧路亦盛傳會加盟祖雲達斯，而譚美阿巴謙又被英超三大豪門睇中，摩佬暫時已免簽愛將尼曼查馬迪，由於轉會預算唔高，摩佬惟有繼續向自由身球員埋手。
意大利《羅馬體育報》指，羅馬正力斟「大聖爺」巴利。摩佬一直極度欣賞巴利，之前「大聖爺」落難，摩佬將佢借返嚟熱刺，嗰季二人合作，巴利上陣34場入16球，表現係近年最好，而且巴利依家踢波唔係為錢，係為咗提升狀態踢年底嘅世界盃，羅馬+摩佬，自然係最理想選擇。
除咗巴利，另外三位曼聯舊部，達洛治、連格同埋C朗，亦係寸王嘅目標，冇寫錯，堅有C朗份！
意大利《共和國報》報導，37歲嘅C朗，堅頂唔住坦克格喺前場逼搶嘅踢法，認為咁會令佢體力下降，入球量受到打擊，已經委託經理人佐治文迪斯搵新東家，依家有兩間接洽緊，其中一間就係羅馬，另一間係母會士砵亭。
摩佬同C朗曾經喺皇馬合作，當時佢兩個有幾弗唔使多介紹，而且佢兩個都係葡萄牙人，同聲同氣，既然曼聯同羅馬都係踢歐霸，C朗揀羅馬同跟過嘅摩佬，一啲都唔奇。
