尋晚意甲焦點戰，羅馬作客以3:1反勝維羅納，唔單止升上意甲第4位，更重要係主帥摩連奴又有得威，佢變陣下派18歲小將禾柏圖落場，最終就係呢位小朋友完場前1傳1射、奠定勝局。
羅馬今戰喺上半場26分鐘就失守，達維杜域斯改變方向建功，維羅納領先1:0，但10分鐘後，呢位守將因粗野攔截直接領紅，維羅納踢少個，羅馬即時群起而攻，上半場補時，譚美阿巴謙半單刀中柱，辛尼奧路補中，扳成平手。
換邊後，羅馬一直㩒住嚟揪，比洛迪、艾沙拉維等鋒將已經落晒場，但依然冇計，唔係中楣就係自己把握唔到，直到完場前2分鐘，18歲小將禾柏圖喺禁區頂撞射得手，羅馬終於領先2:1，之後禾柏圖再餵個直線，艾沙拉維妙射，鎖定3:1勝局。
18歲嘅禾柏圖喺澳洲出世，之前亦一直喺悉尼受訓，直到2020年獲羅馬青年軍邀請試腳，結果成功踏上職業路，仲獲羅馬傳奇托迪加持做經理人，之後成為意大利小國腳，表面睇一帆風順。
由於禾柏圖只係代表過意大利青年梯隊，即係話澳洲足總仲有機會游說佢「認祖歸宗」，代表澳洲踢世界盃。
但事實上，禾柏圖對澳洲足球未必有好感，除咗技術層面外，其實禾柏圖曾經食過FC悉尼同西悉尼流浪者檸檬，喺青訓階段被踢走，所以先毅然出國去羅馬碰運氣。
去到舊年12月，有傳澳洲國家隊主帥格拉咸阿諾想徵召佢踢世盃外圍賽，但最終冇成事，直至2月，禾柏圖取得意甲處子入球，但阿諾仍然話暫時唔會徵召佢，到3月嗰陣，澳洲喺外圍賽不敵日本，禾柏圖被爆喺snapchat，用一張比分相加兩個恥笑emoji串澳洲，尷尬嘅係之後意大利不敵北馬其頓緣盡世盃，而澳洲之後則過關斬將進身決賽周。
之後禾柏圖理所當然被口誅筆伐，被喪插幼稚、小學雞等等，引起軒然大波，不過禾柏圖嘅恩師、澳洲著名青訓教頭Basha，話自己同禾柏圖傾過，件事根本係畀人擺上檯，張圖同emoji，只係禾柏圖同佢朋友私下嘅一個玩笑。
究竟阿諾最終點揀？照徵召禾柏圖？禾柏圖又制唔制？澳洲球迷又點睇？下星期前將會有答案。
至於摩連奴，賽後當然對自己嘅調動、以及禾柏圖嘅天賦讚不絕口：「我畀佢落場，唔係因為痴咗線、又或者喺度荒謬咁賭博，講真，我唔肯定佢會唔會入波，但我肯定佢有咁嘅能力。」
