星期日凌晨零時30分，今季嘅意甲就開波嘞。睇番本地開出嘅奪標賠率，一如以往係三強鼎立局面，順序為大熱國際米蘭(2.02倍)、次熱祖雲達斯(3.35倍)以及三熱AC米蘭(3.85倍)。
講真，呢類長達10個幾月嘅長線投資，唔係個個都啱玩，主要都係季初階段用嚟參考吓各隊實力。但如果點都要揀隊開心吓的話，整隻第四熱門羅馬玩吓囉，依家有9倍。羅馬除咗領隊摩連奴繼續執教係個利好因素之外，好波之人戴巴拿、以前踢過利記嘅雲拿當、仲有摩佬契仔尼曼查馬迪。上述3位今季都去到呢支首都球隊。睇落個陣容都幾唔錯。有9倍咁好分頭，細細注一試無妨！
正如之前講到，今季意甲頭場於星期日凌晨零時30分展開。上屆冠軍AC米蘭主場對烏甸尼斯，同時間開波仲有森多利亞主場對阿特蘭大。
咁就講吓直播嘅AC米蘭啦，讓球開到AC米蘭讓一球/球半，個上盤好似辣得滯喎。雖然烏甸尼斯唔係咁叻，但未至於任你數嗰隻，下盤較為可取。
