A米史上第二位日本球星，即將空降聖西路！而且仲要係免費！
意大利、德國包括Patrick Berger等多位名記及傳媒報導，法蘭克福球星鎌田大地，即將落實以自由身加盟AC米蘭，雙方將簽約一份稅後年薪300萬歐元、為期5年的合同。
現年26嘅鎌田大地，係德甲黑馬法蘭克福嘅核心，今季為球隊上陣45次，帶來16個入球及6次助攻，上季更加喺歐霸盃轟入5球，成為球隊捧盃嘅關鍵功臣。
鎌田同法蘭克福嘅合約今夏完結，兩者幾乎肯定會分手，而唔少勁旅都吼到鎌田實一實，當中包括傳咗好耐嘅多蒙特同馬德里體育會，尤其更盛傳「蜜蜂兵團」已開出年薪600萬歐元利誘其過檔。
不過，鎌田決定加盟薪金較低嘅AC米蘭，除咗歷史及環境（據稱鎌田鍾意米蘭）因素，消息指轉任A米管理層嘅馬甸尼，除咗行動迅速，仲為呢件事畀到極大誠意，最終打動鎌田，繼早年嘅本田圭佑後，成為第二位為AC米蘭效力嘅日本球星。
鎌田將會於本周內到米蘭體檢，A米陣中嘅借將巴謙戴亞斯，預計會退番畀皇家馬德里。
