好多傳媒為咗方便起題，都好鍾意拎球員人名溝埋嚟統稱前鋒組合名，近代最出名嘅當然係「MSN」，美斯（Messi）、蘇亞雷斯（Suarez）同尼馬（Neymar），以及「BBC」賓施馬（Benzema）、巴利（Bale）同C朗（Cristiano Ronaldo）。
本地傳媒起嘅「埃及文明」沙拿、文尼同法明奴，更將組合名提升到意會嘅層次，嚟緊意甲班霸國米，好有機會出現一個更加勁嘅組合：「DLLM」！如果成事，呢次直情係將廣東話嘅文化發揚光大！
國米上季失落意甲冠軍，好大程度係因為盧卡古返咗車路士，而迪斯高始終年事已高，去到季尾表現嚴重跌Watt所致。雖然失利，不過國米都有番1億鎊落袋，而更令國米球迷興奮嘅，事隔一季，盧卡古就極有可能重返國米，而且係以一折嘅跳樓價（1000萬鎊借用費）回歸，堅開心仔！
2020/21球季，盧卡古（Lukaku）拍拿達路馬天尼斯（Lautaro Martinez）狂入49球，單計聯賽亦入41球，係國米橫掃意甲嘅關鍵功臣。佢兩個重組，威力夠晒保證。
有LLM，當然要整埋個「D」先夠霸氣。戴巴拿（Dybala）目前仍然係自由身，據報依家呢位阿根廷球員處於二揀一狀態，最大機會係國米，而另一間同戴巴拿傾緊嘅球會，係AC米蘭。
國米首席執行官Giuseppe Marotta已打晒開口牌，話正努力搞緊盧卡古同戴巴拿嘅轉會：「係，唔使揣測，我哋的確同緊盧卡古同戴巴拿傾轉會，不過除咗佢哋，仲有另外嘅目標，總之，我保證國米球迷一定會滿意我哋今夏嘅工作。」
