戰神強勢回歸！經過近9個月嘅養傷期，瑞典41歲神鋒伊巴謙莫域，近日已正式重投操練，日前更已跟大隊一齊練波，極有可能會入選今晚周五深夜對拖連奴嘅大軍名單，上季意甲冠軍AC米蘭，能否借勢反彈？
A米今季表現大跌Watt，近4仗更錄全敗劣績，目前21戰僅得38分排第6，遠遠落後榜首拿玻里18分，莫講話要衛冕，就連衝入前4都有困難，攻力同信心不足成為其中一個關鍵，伊巴復出，除咗令進攻組合更多變化，更重要係佢嘅地位，喺更衣室可以提升士氣，絕對係及時雨。
伊巴前日接受米蘭電視台訪問，講咗好多佢自己呢9個月以嚟嘅感受：「兩年前，我哋喺一個空空蕩蕩嘅球場踢波，依家已經唔係喇！我哋嘅成就，有一半係球迷畀我哋嘅！我好滿意我哋嘅球迷，所以我哋必須全力以赴，令球迷都對我哋滿意。」
「對唔住，我好想喺球隊困難嘅時候挺身而出，可惜我做唔到……世界盃嘅假期改變一切，前6個月我哋係第2名，我哋仍然係嗰一隊波，我哋需要盡快恢復，仲有好多比賽要踢！我哋贏過 19 次聯賽冠軍同 7 次歐聯冠軍，絕對唔係巧合。呢度係米蘭，我哋必須贏波！」
到尋日伊巴接受Sport Mediaset訪問，更直言：「我仍然係上帝，我仍然係第一，我返嚟喇，(意甲)旋律將會改變！」
