蘇寧集團欠債問題嚴重，經常都有報道指，旗下意甲球隊國際米蘭將會放盤。
據意大利商業報章《Il Sole 24 Ore》所述，位處巴林的基金公司InvestCorp將會同蘇寧接洽，商討入主國際米蘭。InvestCorp亦已準備好文件，希望引入更多投資者，以優化整個收購計劃。
其實大約1年前，InvestCorp被傳出同AC米蘭有聯絡，但最終被紅黑兵團管理層拒絕。唯InvestCorp仍熱衷於收購球隊，而考慮到國際米蘭遇到嚴重財政問題，放盤可能性較大，故令InvestCorp最近就作出決定，加快計劃進度。
提到InvestCorp，其實以往佢哋曾將資金投放到意大利，比如Gucci以及男士時裝品牌Corneliani。以InvestCorp基金公司高達500億美金嘅總資產，相信價錢方面問題唔大，只係等蘇寧集團簽名。暫時國際米蘭估價為10至12億歐元，呢個金額，應該有助現任班主張康陽減輕債務負擔。
