【意甲】少帥新Icon!莫達調教最穩陣黑馬;博洛尼亞衝前4 Mark實林寶堅尼

少帥Icon,點止阿迪達?意大利一向盛產好教練,今季最出位嘅,就一定係現年41歲嘅博洛尼亞教練莫達。呢位前意大利國腳,今季帶領球隊取得佳績,暫時位列意甲第4,只落後畀3支傳統勁旅米蘭雙雄以及祖雲達斯!

若果保持穩定演出,博洛尼亞隨時取得來季歐聯資格。需知道博洛尼亞成立超過100年來,從未參加歐聯。相信球員、球迷、班主、贊助商以及教練莫達,都對於歐洲賽有好大憧憬。

話莫達係意國出品,其實只係啱一半。查實佢喺巴西出世,17歲就去到西班牙加盟巴塞B隊,之後就升到一線隊。踢過6季後就轉投馬體會。因傷患關係,少有出場機會,及後就轉戰意甲熱拿亞、國際米蘭,最後去到法甲巴黎聖日耳門,2018年正式掛靴。

以為莫達搵夠錢就返巴西歎世界?唔係,佢對足球運動有無限熱情,退出球員生涯後就決心投身教練工作。莫達掛靴後返意大利,去享負盛名嘅教練學堂:意大利佛羅倫斯足球技術中心學法,修讀歐洲足協教教練牌照課程,展開執教之路。

畢業後莫達短暫教過巴黎聖日耳門U21,及後去到意甲熱拿亞。無奈球隊質素有限,加上當時莫達經驗不足,未能協助熱拿亞護級,護級任務失敗後隨即被炒。2021年轉到史比利斯,雖然球隊資源有限,但莫達憑穩打穩紮理念,協助球隊逃離降班威脅。去到2022/23球季,莫達正式執教博洛尼亞,接替因病去世嘅米赫洛域,當季博洛尼亞以第9名衝線,今季就就更上一層樓,唔單止打入積分榜前半頁,仲有機會爭歐聯資格。

睇返今季博洛尼亞演出,可以用「穩健」一詞去形容。你唔會見到博洛尼亞有超華麗進攻,但中後場防守相當嚴密,減少失誤係博洛尼亞今季成功關鍵。

意大利傳媒指,若博洛尼亞取得歐聯資格,位處當地嘅世界著名超跑品牌林寶堅尼就會贊助球隊。實在早前林寶堅尼已宣布,同博洛尼亞女子隊達成贊助協議,合約至2025年。為求得到大車廠更多支持,相信博洛尼亞以及莫達,都會盡全力爭取好成績。