意甲大戰日激好睇！打頭陣國米鬥羅馬，聖西路球場全程招呼「反骨仔」，羅馬中鋒盧卡古最終零射門，球隊輸0:1；而AC米蘭作客拿玻里，喺領先兩球下被對手連追兩球逼和，入兩球嘅A米大佬基奧特被換走時，亦忍唔住流下男兒淚。
盧卡古目前嘅老細仍然係車路士，上季借畀國米，令比利時中鋒重生；但佢喺球季結束後，心思思想轉會祖雲達斯，懶理國米高層游說，連好拍檔拿達路馬天尼斯打畀佢都唔聽，結果最後去唔成祖記，幾乎要留喺車仔坐成季，好在摩連奴最尾搵咗佢過羅馬。
再見「叛徒」，國米球迷當然好好招呼盧卡古，據講全場有4萬個哨子，只要巨嬰一掂波就吹爆佢；昔日老友拿達路馬天尼斯，亦對盧卡古視而不見。
羅馬缺少停賽嘅摩連奴督師，全場捱打，終於80分鐘由迪馬高左路傳入禁區，馬古斯杜林撞射破網，國米全取3分，繼續居於榜首。羅馬各項賽事5連勝斷纜，目前意甲排第8。
至於拿玻里對AC米蘭就激好多，上半場A米有多個黃金機會，基奧特把握到兩個，兩球都係頭槌破網。換邊後拿玻里發力，先由普利達奴個人表演追成1:2，其後拉斯柏度尼靚罰球，追成2:2完場。
基奧特喺81分鐘被換離場後，坐喺場邊默默為隊友打氣，期間更忍唔住喊，令人心酸。賽後銀河唯一受訪，坦言覺得好失望：「我唔係機械人，我都有情緒，我認為我仲幫到隊友，但教練亦有權選擇，我尊重佢嘅決定。5分鐘後我冷靜番，我唔想走，因為我仲想幫球隊。」
「我哋失咗兩分，係令人沮喪，不過我哋係一支質素好高嘅球隊，我哋創造咗好多機會，亦好有觀賞性，希望嚟緊會再改善把握能力，我哋係唔會放棄。」
