AC米蘭於歐聯4強出局後，表現即刻回升，剛啱就以5比1狂數已降班球隊森多利亞，法國前鋒基奧特更大演帽子戲法。除此之外，西班牙中場巴謙迪亞斯今場演出亦相當搶鏡，盛傳下季好可能回歸皇家馬德里。
AC米蘭於上半場9分鐘先開紀錄，巴謙迪亞斯妙傳畀拉菲爾里奧，後者推前入禁區射成1比0。20分鐘，40歲嘅森多利亞前鋒加利亞雷拉撞射追和1比1。失球後嘅AC米蘭即提升行軍速率，向對手施壓予極大壓力，更於23分鐘再有入球。巴謙迪亞斯左路傳中，基奧特頭錘頂成2比1。
AC米蘭再次領先，當然食住個勢繼續進攻。29分鐘拉菲爾里奧於禁區被踢跌，球證判罰客隊十二碼，基奧特主射成3比1。上半場雙方已經炮製4個入球。
下半場依然可觀，63分鐘，AC米蘭中場當拿利禁區右路橫傳，巴謙迪亞斯輕鬆射成4比1。68分鐘，上半場有入球嘅菲爾里奧傳中畀基奧特，後者力壓對方守衛起左腳射成5比1。
AC米蘭贏波後，以64排行第5，落後畀第4位拉素1分，仍然有機會爭取來季歐聯資格。AC米蘭最後2輪聯賽，分別作客祖雲達斯以及主場對維羅納。
而祖雲達斯於歐霸出局後，今晚就會作客對安玻里，目前佢哋69分排第二，仍未鎖定前4資格。
