只要未死，翻身總有機！
德國門將卡利奧斯喺2018年歐聯決賽連番出醜，跌入人生谷底，一沉百踩，以為足球生涯就此玩完，點知原來佢冇放棄，並把握上星期一次意外嘅正選機會，成功翻身，唔單止令球迷刮目相看，仲獲得意甲班霸國際米蘭嘅垂青。
上星期聯賽盃決賽，紐卡素正副選門將尼克普比、杜巴夫卡分別因領紅及違規，同時未能上陣鬥曼聯，3號龍門卡利奧斯臨危受命，喺呢場咁重要嘅賽事，把守最後一關。
接近2年冇比賽，卡利奧斯冇花生友預期中嘅出醜，反而表現出色，作出8次撲救，紐卡素雖然最終以0比2敗陣，但卡利奧斯卻係隊中評分最高嘅球員。
卡利奧斯獲一致好評，《FC Inter News》日前仲報導，指國際米蘭希望斟介呢位29歲門神，做正印奧拿拿嘅副手。國米原本嘅副選漢丹洛域已年屆38，而卡利奧斯同紐卡素喺季尾就會完約，可以今夏免費加盟，依家佢打番起信心，兼且有大賽經驗，啱晒國米胃口。
一般估計，卡利奧斯會接受報價，除咗因為由3號升格為2號，另一個關鍵因素係佢女友Diletta Leotta。31歲嘅Diletta一直被譽為意甲最索記者，佢喺卡利奧斯人生低潮時，一直不離不棄、鼓勵男友，被唔少網民封為夢幻女友，如果卡利奧斯去意甲發展，在公在私，都係一件好事。
