今屆意大利盃決賽於中立場羅馬奧林匹高球場上演，由國際米蘭對費倫天拿。國米憑拿達路馬天尼斯連轟兩粒，協助球隊衛冕意大利盃。
歷史上捧意盃次數最多為祖雲達斯，總數為14次。國際米蘭今年捧盃後，意盃勝出次數累計9次，與羅馬一樣並列第2位。
費倫天拿聯賽排名雖不及國際米蘭，但今場演出絕對唔曳，而且係先開紀錄一方。上半場2分30秒，中場伊干尼於禁區左路橫傳，皮球越過國際米蘭守衛，再由伏兵遠柱嘅尼高拉斯干沙利斯輕鬆射成1比0。
縱然「紫百合」有個夢幻開局，但領先優勢好快就消失。29分鐘，國際米蘭中場波索域直線劏開費倫天拿防線，拿達路馬天尼斯高速入楔起右腳射遠柱而入，為國米追和1比1。
37分鐘，國際米蘭中場巴利拉傳中，拿達路馬天尼斯再顯射手本色，球不著地凌空窩利抽射入網。呢腳妙射令國米反超前至2比1，亦係拿達路馬天尼斯為國米於所有賽事取得第101個入球。
下半場費倫天拿雖然積極反攻，力求再次射破國際米蘭大門。無奈努力未能換來成果，最終國米維持2比1優勢，成為今屆意大利盃最終贏家。
費倫天拿雖然輸波，但今季仲有盃爭，所講嘅係歐協聯決賽對英超韋斯咸，勝方將獲得來季歐霸盃資格。
至於今場入兩球嘅拿達路馬天尼斯，總計喺國家隊及球會賽事，曾經8次打入決賽，7次封王，唯一失手係喺歐霸輸畀西維爾，國米靠佢嘅威力，能否爆冷擊敗曼城？
