之前有球迷問，點解國際米蘭球衣胸口無贊助商？查實係前贊助商亦即加密貨幣公司Digitalbits莫財走數，國際米蘭從來都無收過錢，一怒之下決定將贊助公司招牌刪走，當中包括女子隊以及青年軍。
好快就有新贊助商同國際米蘭接洽，就係成人網站My.Club。據英國《鏡報》等媒體所講，My.Club將會提供一份總值達1億歐元合約，以獲得國際米蘭球衣贊助權，合約至2029年。
呢個成人平台標榜真人互動，絕對唔係AI做假。而My.Club副主席米克福特就話，希望國際米蘭前鋒拿達路馬天尼斯，於歐聯賽後上My.Club分享獨家視頻，吸納更多粉絲關注My.Club。
另外，國際米蘭老闆張康陽經常被指財困要賣盤，但今季球隊表現唔錯，唔單止有新贊助商，其他收入亦都有提升。
據意大利方面估算，國際米蘭今季連同各項賽事獎金以及門券收入，將會達到1億4000萬歐元。即將於土耳其伊斯坦堡舉行嘅歐聯決賽，國際米蘭球迷就分到2萬個座位，當然呢批門券收益亦歸入球隊當中。
成日都有報導指有球員要走，但其實唔係個個都咁諗，就好似前鋒盧卡古，希望繼續效力藍黑兵團。今季之後呢位比利時國腳就完成外借合約，再次返到英超車路士。不過盧卡古就話好享受米蘭市生活，唔係太想返倫敦。
有指呢位比利時前鋒仲同國際米蘭高層表示，願意減人工繼續為球隊效力。國際米蘭對於「野獸」效忠自然感到欣喜，之不過車路士未必肯放人，就算放都未必平，要睇吓雙方有無辦法傾掂數喇。
