星期二凌晨有兩場意甲舉行，頭場羅馬就憑後衛史摩寧一頭定江山，以1比0險勝升班馬克雷莫納。入球功臣史摩寧除咗話頂入致勝球之外，成場助攻助守演出都相當之搶鏡，於後場瓦解大部份克雷莫納高空攻勢，難怪領隊摩連奴對佢咁信任。
其實全場比賽都由羅馬主導，若非克雷莫納門將拉度有非凡演出，羅馬應該早就打開紀錄。而比賽去到65分鐘，羅馬隊長羅倫素柏歷堅尼開出角球，史摩寧遠柱頂入全場唯一入球奠定勝局。史摩寧仲走到場邊，舉起新加盟球員雲拿當球衣，希望呢位荷蘭人可以早有康復。
另外，羅馬紅人翼鋒辛尼奧路，於比賽第44分鐘肩膀甩骹，經治理後都無法堅持比賽，羅馬以艾沙拉維入替。經過詳細檢查後，辛尼奧路雖然無骨折，但都要休息3至4個星期，咁即係話下輪聯賽對祖雲達斯唔使預佢。
講到祖雲達斯，佢哋作客與森多利亞打和0比0，因新加盟嘅迪馬利亞受傷，加上普巴、費達歷高基艾沙、門將施捷斯尼都未康復，「斑馬兵團」實力難免受到影響。而今場失分其中一個原因，與祖雲達斯前鋒拉賀域被對手完全凍結有關。呢位塞爾維亞國腳於上半場，觸球次數只有3次。本來比賽尾段拉賀域搵到突圍機會，殺到入禁區橫傳畀拉比奧特撞射入網。但球證經女VAR覆該後，判拉賀域越位在先入球無效，就咁雙方悶戰完場，各得1分。
