哈利卡尼真係冇捧盃命？卡尼千辛萬苦，衝破重重障礙，終於獲熱刺放人，以1.2億歐元轉會拜仁慕尼黑。星期五落筆簽約，不足24小時即有德國超級盃上演，以為可以打破球員生涯錦標荒，但連一個季前盃仔，都未能為英格蘭隊長圓夢。
上季聯賽冠軍拜仁慕尼黑，對德國盃冠軍RB萊比錫，合演德超盃戲碼。拜仁今仗由泰爾掛帥，配合穆斯亞拿、基拿比、利萊辛尼攻堅，哈利卡尼先列後備。萊比錫由添姆雲拿掛稿，兩翼為奧姆、沙維施蒙斯。
萊比錫今夏有多名主將離隊，但仍在3分鐘藉左路傳中做成混戰，奧姆射入領先。完半場前，奧姆再轉身射抽入，RB萊比錫半場領先2:0。
卡尼64分鐘入替，但未有貢獻之餘，拜仁再失一球，馬沙拿維禁區犯手球，奧姆射入12碼完成帽子戲法，萊比錫以3:0大炒拜仁，捧走德超盃。
卡尼結束熱刺無冠日子後，去到新東家依然黑仔，想捧盃最快要等到明年，如果佢加盟後連拜仁德甲11連霸都斷䌫，就真係要寫個服字畀佢喇。
「我為卡尼感到難過，佢可能會以為拜仁四個星期冇練過波。」領隊杜曹認為球隊欠缺狀態，表現極差，相信令新加盟前鋒失望不已。
值得一提的是，不少球迷在賽前數小時就在球會的專賣店趕印簡尼9號的球衣，顯見球迷對他寄望甚殷。
