德甲今晚煞科，目前多蒙特領先拜仁慕尼黑2分，今晚主場對緬恩斯，只要贏波就肯定封王，打破拜仁近10季嘅壟斷。
五大聯賽即將落幕，英超、西甲、意甲冠軍一早名花有主，法甲亦99％係巴黎聖日耳門囊中物，估唔到嚟到最後，最緊張刺激、牽動各大球迷心弦嘅，係喺香港冇電視台直播嘅德甲。
各大社交平台，絕大部份球迷都係力撐多蒙特，就連部份名宿都開腔，包括前多仔嘅波蘭名將比斯錫等等，紛紛喺社交網出po，為多蒙特打打氣。
利物浦主帥高普，緬恩斯同多蒙特佢都教過，當然，作為前功勛主帥，高普梗係想多蒙特再度封王啦：「講真，我真係有啲緊張，我好想多蒙特贏波，佢哋有好出色嘅教練同球員，我知道呢場波對呢隊波、以至整個城市有啲咩意義。
高普亦有分享自己執教多蒙特時嘅點滴：「我啱啱嚟嗰陣，我嘅目標好明確，就係要建立一支有鮮明風格嘅球隊。唔係想冒犯緬恩斯，但無可否認，多蒙特嘅陣容係更有實力，去完成我嘅目標。」
講到昔日時光，高普亦謂：「我好好彩，有香川真司呢啲咁成功嘅轉會，當Micheal Zorc佢哋（前多仔名將、時任體育主管）播香川嘅片畀我睇，我充滿疑問，係好好呀，但佢踢J2咋喎，符唔符合到我哋要求？」
隨後，多蒙特僅花費35萬歐元轉會費，就成功將香川真司納入麾下。「喺第一次見到佢同其他球員同時操練之後，我同教練團即刻開心到攬住慶祝。結果佢好快就適應球隊，亦好出色咁貫徹戰術。」
香川真司曾喺2010至2012年效力多蒙特，兩季都助球隊封王德甲，其中2012年，仲幫多仔捧埋德國盃。之後佢轉投曼聯，表現不及喺多仔時期，到2014年重投多蒙特，2019年離隊，目前已回流日職大阪櫻花。
