哈利卡尼係唔係足球史上最大黑仔王，要等今個球季結束先知，但佢無疑正橫掃德甲，不斷刷新紀錄，最新一輪仲射入一個超級金球，媲美當年碧咸經典遠程笠射。
為尋求冠軍，英格蘭隊長離開効力多年嘅熱刺，轉投拜仁慕尼黑。但冇咗哈利，熱剌唔止保持強勢，最新一輪2:1贏水晶宮後，唔止繼續排榜首，仲保持不敗金身，被唔少人睇好有力爭逐冠軍。
網上開始有人講，如果熱刺今季攞冠軍，拜仁反而食白果的話，哈利卡尼就係不折不扣足球史上第一地獄黑仔王。哈利身經百戰，知道不論結果，最重要做好自己，周六德甲，拜仁主場8:0大破達斯泰特，佢又連中三元，繼續喺德甲打橫行。
今場唔只比數大，仲有唔少話題，上半場已經有3張紅牌，達斯泰特贏2:1，導致下半場由原來0:0，45分鐘之內變咗8:0。
69分鐘一幕，更加成為經典，拜仁反擊，卡尼接到湯馬士梅拿傳球，於中圈後場選擇笠射，距離對手龍門超過50米，美妙弧度，衝向天際，再直墜球門之內，企位太出嘅達斯泰特門將舒恩，只能目睹一個奇妙入球嘅誕生。
本賽季歐洲5大聯賽，卡尼係第一個達成10+5（進球+助攻）嘅球員，德甲12球5助攻，唔需要磨合時間。德甲前9場入12球，亦打破艾寧夏蘭特効力多蒙特所保持嘅紀錄（德甲前9場10球），成為德甲史上，前9場入波最多嘅新球員。
早前英格蘭提前得到歐國盃決賽周資格，大部份球員喺夜店玩通宵慶祝，唯有四子之父嘅卡尼返屋企湊仔。多年驗證，專業到一個點，無論有冇冠軍，都會得到尊重。
