咩呀，我好恰啲呀！多蒙特喺德國國家打吡，對拜仁慕尼黑已8連敗，但蜜蜂兵團周日凌晨終於做番場好戲，補時最後一刻入波，收復落後兩球劣勢，主場2:2逼和死敵。
兩支班霸季初表現都麻麻，賽前只排第3同4名，落後柏林聯、弗賴堡。由於有8連勝往績支持，拜仁即使作客，仍然稍為被睇好可繼續食住多蒙特。
接戰之後，多仔勝在夠後生，中前場莫高高（17歲）、當耶爾馬倫（23歲）、比寧咸（19歲）大打快波，速度至上，製造唔少埋門機會，但都操之過急。
拜仁打穩陣波，正前只出基拿比，文尼都縮後少少，打穩守突擊。雖然戰術較保守，反而藉兩次中距離射門，由哥列斯卡、利萊辛尼先後建功，53分鐘巳領先至2:0。
唔想對死敵9連敗，唯有絕地反撲，多仔球員冇氣餒，不斷發動攻勢，令體力下降嘅拜仁開始頂唔住。74分鐘，莫高高近射，追成較接近紀錄，神童只有17歲，成為喺國家打吡射破拜仁大門最年輕球員。
多蒙特之後狂攻無果，賽事補時4分鐘，睇怕逃唔過9連敗厄運，奇蹟喺94分鐘02秒出現，中堅尼高舒洛達碧克殺落底線傳中，後備前鋒莫迪斯迪近門頂入，追和2:2完場。
3分袋咗落袋，都要跌番出嚟，拜仁CEO、一代大猩猩門神簡尼，喺看台睇到眼火爆，激動到由座位跌咗落地。
又難怪簡尼咁炆憎，德甲踢咗9輪，拜仁冇晒統治力，只得4勝4和1負，羅拔利雲杜夫斯基離隊，冇咗個入球機器中鋒，影響實在太大，文尼唔係羅拔仔類型，亦未完全融入拜仁體系。當然，平均質素拜仁依然優於對手，最後奪冠機會仍高，但過程唔會如近幾季，由羅拔仔統治時咁輕鬆咯！
