【德甲】狂落坦克面!單騎闖關博到12碼 辛祖又有貨交 多蒙特連續兩場大捷

辛祖又有表現,狂落坦克面!辛祖回歸多蒙特後,連續兩場參與入波,周六晚作客科隆,呢位英格蘭翼鋒以一己之力博到12碼,助多蒙特以4:0大勝對手,力逼前4位置。

上季喺德甲爭標功虧一簣嘅多蒙特,季前賣走比寧咸後,聯賽成績大跌watt,早前更一度連續6場不勝,直到上仗歇冬期結束後,獲辛祖回歸,終以3:0擊敗達斯泰特,該仗辛祖仲有球靚助攻,打響回歸頭炮。

嚟到周六晚,多蒙特作客科隆,辛祖時隔近5個月後,終於再嘗正選滋味,而且表現活躍,上半場12分鐘,荷蘭國腳馬倫藉角球先開紀錄,之後科隆奮起狂攻,可惜最近磅嗰球過唔到門楣,去到下半場56分鐘,辛祖連過兩關後突入禁區被拉跌,球證直指12碼點,富克洛操刀搞掂,亦係呢球波,完全打沉咗科隆。

隨後馬倫冷靜單刀整多粒,莫高高完場前錦上添花,最終多蒙特贏科隆4:0,連續兩場大捷,18戰33分升番上第5位。

辛祖未返多蒙特前,已經連續5個月冇落過場,甚至連波都冇得練,一返德甲後就即時有貨交,的確令唔少球迷大感意外。尤其同坦哈格鬧翻之後,之前取代佢嘅安東尼至今仍然未有入球及助攻,令曼聯主帥處境相當尷尬。

辛祖第一次效力多蒙特時期,出戰137場,入50球及送出64次助攻,身價最高曾達1.3億歐元。