周六凌晨德甲榜首大戰，戰情激烈戰果有爭議性，利華古遜兩度落後，藉補時12碼，作客2:2迫和拜仁慕尼黑。利華主帥沙比阿朗素自上任後，兩鬥班霸1勝1和，由名宿變身做拜仁尅星。
兩隊賽前都係3戰3勝，利華以較佳得失球居榜首，經今場和波，今季德甲再無全勝球隊。拜仁今場繼續用卡尼掛帥，湯馬士梅拿、辛尼、基拿比作出支援。至於利華少帥沙比阿朗素，以域斯、荷夫曼支援邦尼菲斯，沙加喺中場指揮。
開賽7分鐘，拜仁角球攻勢，卡尼接應頂入，先開紀錄。24分鐘，基馬度超靚罰球破網，追成1:1。換邊前邦尼菲斯越位食詐胡，辛尼18碼超勁施射，利華門將軒迪斯基飛盡撲走，雙方和波完半場。
換邊後戰至57分鐘，卡尼近射被救出，80分鐘，邦尼菲斯黃金機會被拜仁門將烏列治化解。去到87分鐘掀起高潮，哥列斯卡門前建功，拜仁2:1再度領先，以為3分在望，但去到補時4分鐘，荷夫曼博到12碼，柏拉斯奧斯主射扳平，拜仁之後有烏柏美簡奴食詐糊，2:2完場。
利華得嗰球12碼，其實有啲爭議性，荷夫曼同拜仁左後衛艾方素戴維斯碰撞輕微，但球證舒拉加睇完VAR後判罰12碼。拜仁主帥杜曹賽後搵球證理論，其中1位助教更被出示紅牌。
杜曹話判12碼完全離譜，根本連VAR都唔駛睇；湯馬士梅拿指以呢個尺度，將來大把波要判12碼。
