生命就係咁奇妙，一日未斷氣，一日都有轉機！多蒙特尋晚喺德甲重頭戲，作客以3:0大破奧格斯堡，目前33戰70分，領先次席拜仁2分，聯賽只剩1輪，換言之，多蒙特下仗只要贏波便肯定封王德甲。
足足10季嘅壟斷，拜仁嚟到2022/23球季，大有可能斷纜。3月底炒咗拿高斯文，換上杜曹執教，接連喺德國盃、歐聯出局，依家甚至連拎到麻木嘅德甲冠軍，都出現極大危機。
其實拜仁早前已經自爆過一次，作客輸咗畀緬恩斯，只係後尾多蒙特又和咗波琴，拜仁先拎得番榜首，但尋晚拜仁再以1:3倒輸畀RB萊比錫，真正攞嚟衰。
機會再次出現，多蒙特今鋪捉到實一實，尋晚面對奧格斯堡，賀拿喺下半場梅開二度，加上祖利安白蘭特埋齋，以3:0大勝對手。
賀拿今夏由阿積士來投，本來係代替轉投曼城嘅夏蘭特，點知賀拿開季前確診睾丸癌，為抗癌須要長期缺陣，無論對多蒙特定賀拿自己，都係一個晴天霹靂嘅打擊。
好彩，性格樂天、意志堅定嘅賀拿不單止抗癌成功，喺今年1月更神奇復出，18場德甲入咗9球，今場嘅梅開二度，更助多蒙特拎到爭標主導權，絕對係含金量十足。
德甲將會喺嚟緊周六晚煞科，拜仁慕尼黑將會作客科隆，而多蒙特就會喺主場對緬恩斯。緬恩斯已經冇嘢好爭，近4戰全敗，包括啱啱1:4潰敗予護級隊史特加腳下，多蒙特下場只要發揮正常，就極有機會一搔11年之癢、重奪聯賽冠軍。
