當你主場踢至89分鐘，仍然領先2:0，仲唔係贏咗九成？和都打籮柚喇！但多蒙特真係畀對手創造出奇跡。
尋晚德國甲組聯賽，多蒙特主場出擊，喺44同77分鐘入波，領先至2:0，紀錄維持至89分鐘，勝券在握。
但之後6分鐘，足球奇跡發生，雲達不來梅喺91、93、95分鐘入波，以3:2反敗為勝。多蒙特全場表現其實麻麻，但完場前短短幾分鐘內徹底大崩潰，唔知可以點解釋。
不來梅創造歷史，成為德甲首支89分鐘後攻入3球隊伍。呢支德國老牌球隊，前季降班德乙，今季即刻重返頂級聯賽，自2011年3月10號後，終於再喺頂級聯賽贏波，加上過程超神奇，興奮度打孖上。
多蒙特唔爭氣，咁輸法點向擁躉交代？特別係買咗季票嗰班。此話何解？多蒙特本賽季季票，價錢由240歐元至990歐元，貴絕德甲，但擁躉何等忠誠，賣出率亦冠絕各隊。
對於季票最貴，部分不滿球迷今場喺看台亦拉橫額抗議。其中有寫住：「你要去邊度？多蒙特？喺德甲所有人都知道，佢哋球迷畀錢全國最多，係真愛嗎？價格同去妓院一樣咁貴。我哋付出真愛，但季票比任何一間妓院更貴。」
其實錢唔怕畀，最緊要好態度、有服務，但買咗季票嘅多蒙特擁躉，見球隊咁輸法，真係會嘔血。相較之下，班霸拜仁季票最貴係810歐元；利華古遜、禾夫斯堡最貴只係440歐元，全德甲最平。
