利物浦開季兩連和，下周二凌晨雙紅會，竟然係同曼聯爭開齋，你都咪話唔離奇。
作客和富咸2:2、主場和水晶宮1:1，利物浦兩場波都係先落後一方，特別係對水晶宮，鋒線表現疲弱乏力，只係靠幾時都咁弗嘅路爾斯戴亞斯嘅個人表演，先至追成平手。
唔少球評家同利物浦球迷，都歸咎中場球員表現差，攻守能力都下降，更有聲音係想利物浦喺轉會窗關閉前，收購多蒙特中場祖迪比寧咸，唔好等下季先出手。
利物浦中場線確實唔算頂級，近4季3度畀曼城食住做阿二，唔會只關運氣事。問題一直存在，但今季可能會全面暴露，因為冇咗呢個人：沙迪奧文尼。
文尼轉投拜仁，對利物浦中前場嘅影響，隨住新賽季開始，已逐步浮現。雖然個人風格唔相同，但文尼之於利物浦，猶如奇雲迪布尼之於曼城。但依家網絡世界、流量時代，邊個數據夠強，注目度就更凸顯。
足球唔同其他運動，好多重要貢獻，喺數據上唔會直接體現。所以文尼呢類球員，放喺任何球隊，所有隊友都會知佢有幾厲害同重要。
文尼喺利物浦時期，完美承擔中前場串連嘅責任，佢離隊後，紅軍開季兩仗嘅中前場創造力、串連不足嘅弊病顯露無遺。新加盟嘅達雲紐尼斯完全唔同類型，祖達、路爾斯戴亞斯以至沙拿，都好難做到文尼嘅無私貢獻，冇咗呢支超級KY，潤滑順暢度自然大減。
文尼唔止波好，仲出名人品好。文尼喺離隊之前，向利物浦超過150位職球員，無分職位，全部送上精美禮物盒，上面印上You Will Never Walk Alone字款，顯示對球會之愛。特別係見到文尼無縫銜接，極速融入拜仁，利迷及隊友們自然更懷念呢位「KY王」。
文：沈威廉
